“ဟန္ဒမယံအာဝုသော ဓမ္မဉ္စ ဝိနယဉ္စ သၚ်္ဂါယာမ ပုရေအဓမ္မော ဒိပ္ပတိ ဓမ္မောပဋိဗာဟိယျတိ” ယွံကောန်တၠတံ ဓဝ်ဟွံဍာံတံဂှ် နူကၠာဟွံဇၞော်မောဝ်ဏီ ဓဝ်ဍာံဍာံတံဂှ် နူကၠာဟွံကၠေံဗ္ဒန်ဏီဂှ် ပိုယ်ဖ္ဍောတ်ဗှ်သှ်ဇျာဲ ပတိုန်ပါၚ်စိုတ် တဝှ်ဍောၚ်ဓဝ် တၠဳမၞုံကုပိုန်ကျာ်တြဲ မွဲကကောံမွဲကရောံအိုတ်စိုအ်။ သာ်ဝွံ ကျာ်တြဲသ္ပပရိနိဗ္ဗာန်တုဲဂှ် မှာထေရ်ကဿပ ပၠတရဴတုဲ ပတိုန်ကၠုၚ်လဝ်သၚ်္ဂါယန တၞဟ်နဂွံပ္ညဳပ္ညပ်ဗဗိုန်ပခိုၚ်ကဵု သၞောတ်သၞောဝ်လၟေၚ်ဂၠံၚ်ဍာန် ဓဝ်တၠဳမၞုံကုပိုန်ကျာ်တြဲပိုယ်ဂှ် ဒှ်သွက် ပိုယ်သတ္တံ ဂွံဒ္ဂေတ်ဗက်အာ ဂွံကၠောန်ဗက်ဒးတုဲ ဂွံကွာ်စိုပ်တိုၚ်ပ္ကဴ ဘဝမရန်တၟံလဝ်မတွံဂး ဍုၚ်ဇၞော်နိဗ္ဗာန် ဌာန်မဍိုက်ပေၚ်ကဵုတသိုက်မဒှ်ရ။ လဂွံကဵုပရိနိဗ္ဗာနသုတ်မ္ဂး ကာလကျာ်တြဲသဗ္ဗညု သ္ပပရိနိဗ္ဗာန်တုဲ မူရဴပူဂဵုမွဲ ဂွံဒှ်အ္စာပိုယ်ဂှ်ရော။ မူရဴမၞိဟ်လဵုမွဲ ဂွံဒၠောံဗ္တောန်ပိုယ်ဂှ်ရော။ သာ်ဝွံမှာထေရ်အာနန် ချပ်ဂွံအောန်စိုတ် လရိုအ် ယာံတိုန်တုဲ ကာလဂှ် ကျာ်တြဲမြော်တိုန်သာ်ဝွံရ။ သုတ်, အဘိဓရ်, ဝိနယ်အဲကျာ် တွံလဝ်တုဲဂှ် ဒှ်အ္စာမၞးတံညးဂမၠိုၚ်ရ။ ထံက်ရံၚ်ကဵုဂလာန်မန်မ္ဂး “နဟွံမွဲကဵုဓရီု ကဠီုဟွံမွဲကဵုကရံၚ်” မ္ဂးဍေံမံၚ်ဟွံလအ် ကြက်ဒးလီုအာ ဗွဲမလောဲသွာမာန်ရ။ ညံၚ်ရဴသာ်ဂှ်ကီု ဂကောံမွဲမွဲ ဂွံတန်တဴအာ ဗွဲမလံလကာဖာမာန်ကီု သ္ဂောံပြုပြေၚ်ဖန် ဖက် ပရေၚ်ကမၠောန်ဂကောံ ဂွံကဠေတ်ကဠောတ်မာန်ကီုတုဲ စဳပၞောန်မ္ဂးဂှ် ဒှ်လမျီုဂကောံ ဒှ်လတေၚ် ဗီုဂွံပြုပြေၚ် ကမၠောန်ဂကောံရောၚ်။ ဟိုတ်ဒှ်သာ်ဂှ်ရ ပ္ဍဲကဵုစၟတ်တ္ၚဲ (၃၁၊ ၀၈၊ ၂၀၀၈) အခိၚ်ဗတံတက်ပယျာံ (၉) နာဍဳကဵု (၃၀) ဗဳဇနာဂှ် ဂကောံသၚ်တက္ကသိုလ်တံညးဂမၠိုၚ် သ္ပပဓာန်ကဵု ကျာ်ဇၞော်အ္စာ တၠဂုဏ်အ္စာ ခမဳသၚ်မန်တံညးဂမၠိုၚ်တုဲ ကောံဓရီုသဳကၠဳ ဖျေံရိုဟ်ကၞက် ဒက်ပတန်လဝ် “ဂကောံကွးဘာတက္ကသိုလ်သၚ်မန်ဍုၚ်သေံ” မဒှ်ရ။ ဂကောံဝွံ တၞဟ်နဂွံတန်တဴအာ ဗွဲမခိုၚ်ဗိုန်ကီု သီုကဵုဂွံဒ္ဂေတ်ဗက်အာ လၟေၚ်သၞောတ်သၞောဝ် ဗီုပြုပြေၚ်ကမၠောန် ဗွဲမလောဲသွာမာန်ကီုတုဲ မ္ဒးဖျေံလဝ်ဗီုပြၚ် တၚ်တုပ်စိုတ်သၞောဝ်ဂကောံဝွံ မဒှ်ရ။ ဥက္ကဌ တၠဂုဏ်ကေသရမောဠိ ဂကောံကွးဘာတက္ကသိုလ်သၚ်မန်ဍုၚ်သေံ ကမ္မတဳညးမရေၚ်တၠုၚ်ကေၚ်ကာဂမၠိုၚ် 2008